Tunisia oo Madaxweyne cusub loo doortey

Qays Saciid oo maanta loo doortey madaxweynaha dalka Tunisia ayaa lagu sheegay in uu yahay nin ehludiin ah, oo siyaasadda ku cusub, waxa uu hadaba guul aad u weyn ka gaaray doorashadii is reebreebka  ahayd ee Tunisia, isaga oo ka adkaaday maal-qabeenka warbaahinta, Nabiil Quray, sida ay muujineyso natiijo horudhac ah.

Saciid, oo si madax banaan u tartamay ayaa helay ugu yaraan 72.5% codadka, sida ay muujineyso natiijada horudhaca ah ee ay sii daysay shirkadda Emrhod, wuxuuna 40 dhibcood kaga adkaaday Quray.

Kumanaan qof ayaa isugu soo baxay waddooyinka magaalada caasimadda ah ee Tunis, si ay ugu dabaal degaan guusha Saciid, ayaga oo ku heesayey astaanta qaranka.

“Waa maallin taariikhi u ah Tunisia, Tunisa waxay guraneysaa mirihii kacdoonka,” waxaa sidaas yiri Boussairi Abidi oo ah 39 jir makaanik ah. “Qays Saciid wuxuu soo afjari doonaa musuq-maasuqa, wuxuuna noqon doonaa madaxweyne caddaalad ah.”

Natiijada rasmiga ah ayaa la filayaa in lagu dhowaaqo maanta oo taariikhdu tahay 14.Okt.

Saciid ayaa uga mahad-celiyey da’yarta dalka “inay bog cusub fureen,” wuxuuna wacad ku maray inuu isku dayi doono inuu dhiso “Tunisia cusub”.

Qiyaastii 90% dadka da’doodu u dhaxeyso 18 illaaa 25 ayaa u codeeyey Saciid Qeys, sida ay muujisay ra’yi uruurin uu sameeyey machadka Sigma.

AFP

Category